ملتان۔7دسمبر(اے پی پی) وفاقی وزیر توانائی خرم دستگیرآکھیے جو اساں پاکستان اچ سستی بجلی ݙیوݨ دا منڈھ ٻدھیندے پیوں،شمسی توانائی دے ذریعے ݙتی ونڄݨ آلی بجلی نال عوام کوں فیدہ تھیسی تے زراعت وی ترقی کریسی ۔ اے ڳالھ انہاں ٻدھ کوں لیہ دی تحصیل چوبارہ اچ 100 میگا واٹ دے زینفا شمسی توانائی منصوبے دی افتتاحی تقریب توں خطاب کریندے ہوئیں آکھی اے ۔ انہاں آکھیے اے نجی شعبے اچ شمسی توانائی دا ساریں توں وݙا منصوبہ اے ۔ پاکستان اچ بجلی پیدا کرݨ دے کارخانیں اچ ساریں توں سستی بجلی زینفاسولردی اے۔انہاں مزید آکھیے لیہ دی تحصیل چوبارہ دی کھلی فضا اچ میلاں تے کھنڈیے سولر پراجیکٹ کوں ساݙے مخالفین ݙیکھن تاں انہاں کوں پتہ لڳے جو حکومت کیا کریندی پئی اے ، اے جدید ترین منصوبہ جیں دی بجلی دی استعداد ساریں توں ودھ اے ایجھی جاہ تے لڳیے جیں دا فیدہ کساناں کو تھیسی انہاں دے ٹیوب ویلاں اچ پاݨی آسی تے عوام کوں وی فیدہ تھیسی ۔ انہاں مزید آکھیے وزیراعظم محمد شہباز شریف دی قیادت اچ اساں ایں پالیسی دا اعلان کیتے جو اڳوں سارے نویں کارخانے تیل نال نہ چلسن ،اساں سجھ توں بجلی بݨیسوں ،پاݨی،ہوا اتے تھر اچ کولیں توں بجلی تیار کیتی ویسی ، خرم دستگیر آکھیے جو 1320 میگا واٹ دا کولیں نال چلݨ آلا پرا جیکٹ وختی کم شروع کرݙیسی ،گھراں اچ بجلی وافراتے سستی ہو سی،ساݙی منصوبہ بندی 13000 میگا واٹ شمسی توانائی تئیں ونڄݨ دی اے ۔ انہاں آکھیے اساں تعمیر کرݨ آلے ہیسے ، تخریب کرݨ آلے کائنی ،پاکستان کوں جدید دنیا نال رلاوݨا اے ،گوادر توں خنجراب تئیں جیڑھی وی ترقی نظر آندی اے او میݙے قائد نواز شریف دا وژن اے۔
.jpg)
.jpg)
