اسلام آباد۔4اگست (اے پی پی):وزیراعظم شہباز شریف نیشنل ایرو سپیس سائنس اینڈ ٹیکنالوجی پارک (این اے ایس ٹی پی) دا افتتاح کرݙتے ڄیڑھا حکومت، بین الاقوامی کمپنیاں اتے نجی شعبے دے ڳانݙھے نال ٻݨیے۔ افتتاح ویلھے خطاب کریندے وزیراعظم منصوبے تے پاک فضائیہ دی قیادت دی تعریف کیتی جو اے خصوصی سرمایہ کاری سہولت کونسل (ایس آئی ایف سی) دیاں سرگرمیاں کیتے فیدہ مند ثابت تھیسی۔ این اے ایس ٹی پی دے چیف ایگزیکٹو آفیسر ایئر کموڈور ڈاکٹر لیاقت اللہ منسوبے تے بریفنگ ݙتی۔ اے قومی اتے تذویراتی اہمیت دا منصوبہ اے اتے ایکو سسٹم نال کثیر الجہتی فوائد ݙیسی، ایرو سپیس ٹیکنالوجی منصوبہ ملکی خود انحصاری کتیے اہم ثابت تھیسی، منسوبے اچ 3 کیمپس شامل ہن جیندے اچ پہلا نجی شعبے دی کمپنیاں دا، ݙوڄھا سائبر، مصنوعی ذہانت اتے آئی ٹی کمپنیاں ڄݙاں جو تریڄھا ہوائی جہاز، خلائی، سینسر اتے ایکسپو سینٹر کیتے ہا۔ این اے ایس ٹی پی دے سارے حصیاں کوں خصوصی زون قرار ݙتا ڳئے جیندے نال سبسڈیز، ٹیکس/کسٹم ڈیوٹی اچ چھوٹ سودھا کئی اہم فوائد ملسن۔ نیشنل ایرو سپیس سائنس اینڈ ٹیکنالوجی پارک (این اے ایس ٹی پی) ایوی ایشن سٹی پاکستان دا ہک لازمی منصوبہ اے اتے ایوی ایشن، سپیس، آئی ٹی و سائبر دے شعباں اچ ڈیزائن، تحقیق، ترقی و جدت ودھاوݨ کیتے ضروری عناصر دا ایکو سسٹم ݙیسی۔
