اسلام آباد۔11جولائی(اے پی پی) پاکستان ھک واری ول اعادہ کیتے اقوام متحدہ دی سلامتی کونسل دی قرارداداں موجب جھیڑا جموں و کشمیر دے منصفانہ تے پرامن حل سانڳے کشمیریاں دی سیاسی، سفارتی اتے اخلاقی حمایت جاری رکھیسی ۔ ترجمان دفتر خارجہ ممتاز زہرہ بلوچ پریس بریفنگ اچ آکھیے 93 واں ”یوم شہدائے کشمیر“ 13 جولائی کوں منایا ویسی ۔ ایں ݙینھ 22 کشمیریاں دی شہادت دی یاد منیندے جنہاں 1931 اچ سرینگر اچ ڈوگرہ فورسز دی اندھا دھند فائرنگ دا مقابلہ کریندے آپݨیاں جاناں قربان کیتیاں ۔ ترجمان آکھیے اساں انہاں دی بہادری کوں سلام پیش کریندوں جنہاں کشمیری عوام دے حقوق و آزادی اتے انہاں دے حق خود ارادیت سانڳے ھک دلیرانہ تحریک کوں جنم ݙتا، اے تحریک اڄ تئیں جاری اے ترجمان آکھیے ڈوگرہ فوج دی طرز تے بھارتی فوج گزریل کجھ ݙھاکیں اچ ہزاراں کشمیریاں کوں محض اپݨے حقوق دے مطالبے تے قتل کیتے ، معروف کشمیری نینگر رہنما برہان مظفر وانی انھاں سینکڑاں کشمیری نینگراں اچوں ھک ہن جیڑھے بھارت دے غیر قانونی طورتے زیر تسلط جموں و کشمیر اچ ماورائے عدالت قتل دا شکار تھی چکئن ، انھاں دا اٹھواں ورھیݨا 8 جولائی کوں منایا ڳئے۔ انہاں آکھیے ”یوم شہدائے کشمیر“دے ایں ہفے اچ اساں ھک ول بھارتی حکومت توں مطالبہ کریندوں اوکشمیری عوام دے خلاف ماورائے عدالت قتل اتے مہلک طاقت دے اندھا دھند استعمال دی مہم بند کرے۔
