اسلام آباد۔30اگست(اے پی پی) نگران وفاقی وزیر تعلیم و پیشہ وارانہ تربیت مدد علی سندھی اسلام آباد اچ انٹر بورڈز کوآرڈینیشن کمیشن (آئی بی سی سی) دے ہیڈ آفس دا دورہ کیتے۔ اپݨے دورے اچ انہاں آئی بی سی سی دے ایگزیکٹو ڈائریکٹر ڈاکٹر غلام علی ملاح بریفنگ ݙتی جیں اچ ادارے دے اہم مینڈیٹ، افعال، کردار اتے ذمہ واریاں تے روشنی پاتی ڳئی۔ بریفنگ اچ ڈاکٹر ملاح پاکستان دے تعلیمی شعبے اچ آئی بی سی سی دے تعاون تے روشنی پیندے ہوئیں آکھیے ملک دے مختلف تعلیمی بورڈز اچ امتحان اتے تشخیص دے نظام کوں معیاری اتے ہموار کرݨ اچ آئی بی سی سی اہم کردار نبھائے ۔انہاں تعلیمی سرٹیفکیٹس بین الاقوامی معیار دے مطابق ہووݨ کوں یقینی بݨاوݨ اچ آئی بی سی سی دے اہم کم تے روشنی پاتی تے جیڑھے جو طالبیں کوں ملکی تے بین الاقوامی سطح تے مزید تعلیم گھنݨ سانڳے کافی سہولتاں ݙیندے ۔ڈاکٹر غلام ملاح آئی بی سی سی دے نویں اقدامات تے آئی ٹی دے شعبے اچ کیتیاں ڳیاں اصلاحات دا وی ݙسایا ۔ انہاں ٹیکنالوجی کوں اپناوݨ کیتے آئی بی سی سی دے چاتے ڳئے ترقی پسند اقدامات دی وضاحت کیتی جیں پاروں طالبیں ، تعلیمی اداریں اتے ٻئے سٹیک ہولڈرز سانڳے خدمات دی کارکردگی اتے رسائی اچ بہتری آئی اے۔ انہاں ݙسائے اے آئی ٹی اصلاحات نہ صرف آئی بی سی سی دے آپریشنل پہلوواں اچ انقلاب گھن آندی پئی اے بلکہ شفاف تے تکھے تشخیصی عمل اچ وی حصہ پیندی پئی اے ۔وفاقی وزیر مدد علی سندھی تعلیمی شعبے دے معیار اتے تاثیر کوں تکڑا بݨاوݨ اچ آئی بی سی سی دی لگن اتے کوششاں دی تعریف کیتی ۔ انہاں معیاری اتے قابل اعتبار امتحانی اصلاحات یقینی بݨاوݨ اچ آئی بی سی سی دے کردار کوں منیا جیڑھا جو بعد اچ عالمی سطح تے پاکستانی تعلیمی قابلیت دی قدر کوں اُچا کریندن ۔ وفاقی وزیر تعلیمی بہتری سانڳے آئی بی سی سی دیاں مسلسل کوششاں کیتے آپݨی حمایت دا اظہار کیتے تے سرکاری اداریں تے تعلیمی اداریں وچال تعاون دی اہمیت تے زور ݙتا ۔
.jpg)
.jpg)
