اسلام آباد۔22ستمبر (اے پی پی):آندے چووی گھنٹے اسلام آباد، پنجاب، خطہ پوٹھوہار، خیبر پختونخوا، گلگت بلتستان اتے کشمیر اچ اندھاری گھلݨ دے نال کھمݨ نال مینھ وسݨ دا امکان اے جݙاں جو ایں دوران شمال مشرقی پنجاب تے خطہ پوٹھوہار اچ کجھ جہیں تے موسلادھار مینھ تے ڳڑھا پووݨ دا وی امکان اے ۔ محکمہ موسمیات موجب گزریل چووی گھنٹے اسلام آباد، پنجاب اتے خیبر پختونخوا اچ ہوا گھلݨ دے نال مینھ وٹھا اتے ملک دیاں ٻیاں جہیں تے موسم تتا تے رکھا رہیا ، ایں دوران ساریں توں ودھ مینھ اسلام آباد (زیرو پوائنٹ، سید پور 49، گولڑہ 7، بوکرہ 5)، راولپنڈی (شمس آباد 44، چکلالہ 21، کچہری 12)، چکوال 22، لاہور (ائیر پورٹ 19،تاج پورہ 7، اپر مال 6، مغل پورہ 5، گلبر گ 2)، سیالکوٹ (ائیر پورٹ 15، سٹی 4)، نارووال 12،گجرات 10،حافظ آباد8، قصور، جہلم 7، منگلہ 3، فیصل آباد ھک ، کالام 4 اتے مالم جبہ اچ ھک ملی میٹر مینھ وٹھا ۔ جمعہ دے ݙینھ ریکارڈ کیتے ڳئے ودھ توں ودھ درجہ حرارت دی رپورٹ موجب تربت 44، ڈیرہ اسماعیل خان اتے لسبیلہ اچ درجہ حرارت 41 ڈگری سینٹی گریڈ ریکارڈ کیتا ڳئے ۔ محکمہ موسمیات وارننگ ݙتی اے جو 22 اتے 23 ستمبر کوں موسلادھار مینھ پاروں لاہور، گوجرانوالہ اتے راولپنڈی دے پاݨی نشیبی علاقیں اچ پاݨی آوݨ دا ݙر اے جݙاں جو 22 توں 24 ستمبر تئیں موسلادھار مینھ پاروں مری، گلیات، کشمیر، گلگت بلتستان، چترال، دیر، سوات، کوہستان، شانگلہ، بونیر، مانسہرہ اتے ایبٹ آباد اچ لینڈ سلائیڈنگ دا وی خطرہ اے۔
