اسلام آباد۔20جولائی(اے پی پی) وزیراعظم محمد شہباز شریف اسلام آباد اچ آپݨے گزریل دورحکومت اچ شروع کیتے ڳئے ٹیکنالوجی پارک دے منصوبے دا دورہ کیتے اتے تعمیراتی کم تے پیشرفت دا جائزہ ڳھدے تے پراجیکٹ ٹیم اتے وزارت آئی ٹی کوں ہدایت کیتی جو ایں منصوبے کوں وختی پورا کرݨ سانڳے اقدامات تکھے کرن ۔ وزیر اعظم میڈیا ونگ توں جاری تفصیل موجب دورے تے وزیراعظم آکھیے اسلام آباد ٹیکنالوجی پارک پاکستان دا بین الاقوامی معیار موجب پہلا کیٹیگری 3 دا ٹیکنالوجی پارک ہوسی ۔وزیراعظم آکھیے حکومت سنبھیندے ہی ترقیاتی منصوبیں تے 24 گھنٹے کم کرݨ دی ہدایت جاری کیتیاں ہن ،پنجاب اچ بطور خادمِ اعلیٰ ترقیاتی منصوبیں تے 24 گھنٹے تعمیراتی کم کرݨ دا نظام متعارف کروایا ہئی چنڳی ڳالھ اے جو ایں منصوبے کوں پورا کرݨ سانڳے چووی گھنٹے کم جاری اے ۔وزیراعظم آکھیے پاکستان کوں ترقی دے رستے ٹورݨا اے تاں ݙینھ رات محنت کرݨی ہوسی ،بذاتِ خود ہفتے تے اتوار دی چھٹی چھوڑ ݙتی اے ، پاکستان کوں ترقی دیاں منزلاں پار کراوݨیاں ہن ساریں کوں رل تے محنت کرݨی ہوسی ، پروجیکٹ ٹیم اتے وزارت آئی ٹی منصوبے کوں وختی پورا کرݨ سانڳے اقدامات تکھے کرن ۔وزیراعظم آکھیے اسلام آباد ٹیکنالوجی پارک توں ملکی اتے غیر ملکی اکیڈیمیا، محققین، صنعت اتے منصوبہ سازاں وچال جڑت تھیسی ۔ وزیراعظم آکھیے ٹیکنالوجی پارک دی تعمیر توں ملکی آئی ٹی برآمدات اچ سالانہ 70 ملین ڈالردا ودھارا تھیسی ،ٹیکنالوجی پارک بݨݨ نال 10 ہزار روزگار دے نویں موقع بݨسن ۔وزیراعظم منصوبے سانڳے جنوبی کوریا دی حکومت دے تعاون دا وی شکریہ ادا کیتے،وزیراعظم کوں اسلام آباد ٹیکنالوجی پارک دی تعمیر تے پیش رفت اتے منصوبے تے بریفنگ ݙتی ڳئی ،ٹیکنالوجی پارک دا منصوبہ 14.9 ایکڑ زمین تے بݨایا ویندا پئے ۔ بریفنگ اچ ݙسایا ڳئے جو ایں منصوبے اچ بین الاقوامی معیار دا ڈیٹا سینٹر وی بݨایا ویندا پئے ،دورے تے وفاقی وزیرِ اطلاعات عطاء اللہ تارڑ، وزیرِ مملکت آئی ٹی شزہ فاطمہ خواجہ وی وزیرِ اعظم دے رلے ہن
